atha khalu vajragarbho bodhisattva evam eva bhūmyarthaprarūpayamāṇas tasyāṃ velāyām imā gāthā abhāśata /

te bhūmya saptasu viśodhitaprajñ'upāyā mārgā susaṃbhṛta mahāpraṇidhānabaddhāḥ /
supratiṣṭhitā naravarāḥ kuśalopapetā jñānābhilāṣi vidu aṣṭamim ākramanti //13//
te puṇyajñān'upagatāḥ kṛpamaitrayuktā jñānāpramāṇapathagāḥ khagabuddhikalpāḥ /
śrutadharmaniścitabalopagatā maharṣī kṣāntiṃ labhanti anutpādapraśāntisūkṣmām //14//
ādāv ajāta anutpāda alakṣaṇaṃ ca asaṃbhūtatam avinaṣṭata cāpravṛttam /
bhāvasvabhāvavigatā tathatāvikalpā manacittacāravigatāḥ khagatulyakalpāḥ //15//
te evakṣāntisamanvāgata niṣprapañcā gambhīra'cālyaviduśāntavicāraprāptāḥ /
durjñeya sarvajagatārahapratyayaiś ca cittaṃ nimittagrahasaṃjña vibhāvitatvāt //16//
evaṃ sthitāna manucittavikalpa nāsti bhikṣur nirodh'upagato 'paprakalpaprāptaḥ /
svapnoghaprāpta pratibuddha tathāvikalpā brahmāpure ratisaṅgarahito tathaiva //17//
pūrvādhiṣṭhāna sugatā puna codayanti eṣā sa kṣānti paramā sugatābhiṣeke /
asmāku jñānavipulaṃ varabuddhadharmā te tubhya nāsti ta hi vīryu samārabhāyam //18//
kiṃ cāpi śānta tava sarvakileśajvālā jvalitaṃ niśāmya puna kleśagatibhya lokam /
praṇidhānapūrva smara sattvahitaṃ vicārya jñānārthiprārthitakriyā jagamokṣahetoḥ //19//
sada eṣa dharmata sthitā tathatāvikalpā sarveṣu buddhajinaśrāvakapratyayānam /
na hi etinā daśa balāna prabhāvu loke nānyatra jñānavipula tribhi adhva'saṅgam //20//
evaṃ tam apratisamā naradevapūjyā upasaṃharanti bahujñānamukhā vicārān /
jinadharmaniṣpattipraveśam anantapāraṃ yasyā kalā na bhavate puna bodhicaryā //21//
etāni prāpta vṛṣabhī varajñānabhūmim ekakṣaṇena spharate duśatāḥ samantān /
jñānapraveś'upagatā varabhijñaprāptā yatha sāgare vahanu mārutayānaprāptaḥ //22//
sābhogacittavigatāḥ sthita jñānakarma vicinanti kṣetraprabhavaṃ vibhavasthitaṃ ca /
dhātuś catvāri vinibhāgagatāna tāṃś ca sūkṣmaṃ mahadgata vibhakti samosaranti //23//
trisahasri sarvaparamāṇurajo taranti carvāri dhātu jagakāyi vibhaktitaś ca /
ratnā vibhakti paramāṇu suvargatīṣu bhinditva jñānaviṣayena gaṇenty aśeṣam //24//
jñāne vibhāvitamanā vidu sarvakāyān sve kāyi tatra upanenti jagārthahetoḥ /
trisahasra sarva ca spharitva vicitrarūpān darśenti kāyavividhān tatha'nantaloke //25//
sūryaṃ śaśiṃ ca vahi māruta antarīkṣe svakamaṇḍalasya udake pratibhāsa prāptā /
jñānottame sthita tathācaladharmatāyāṃ jagaśuddha-āśaya vidū pratibhāsa prāptā //26//
yatha āśayaṃ jagata kāyavibhaktitāṃ ca darśenti sarvapariṣe bhuvi sarvaloke /
vaśipratyayāśraya jinātmana śrāvakānāṃ darśenti te sugatakāya vibhūṣitāṅgān //27//
sattvāṃś ca kṣetra tatha karmavipākakāyān āryāśrayān vividha dharmajñānakāyān /
ākāśakāyavṛṣabhī samatām upetaṃ darśenti ṛddhivividhān jagatoṣanārtham //28//
vaśitā daśo vimalajñānavicāraprāptā anuprāptajñānakṛta maitrakṛpānukūlāḥ /
yāvac ca sarvajinadharmam upāda karmā trisaṃvaraiḥ susthitam aika acalyakalpāḥ //29//
ye cā balā jinasutāna daśa akṣobhyā tehī upeta avibandhiya sarvamāraiḥ /
buddhair adhiṣṭhita namaskṛta śakrabrahmais tatha vajrapāṇibalakaiḥ satatānubaddhāḥ //30//
imabhūmideś'upagatā na guṇānam anto no śakyate kṣayitu kalpasahasrakoṭyaiḥ /
te bhūya buddhaniyutān samupāsayante bhonto utapta yatha bhūṣaṇu rājamūrdhni //31//
imabhūmideś'upagatā vidu bodhisattvā mahabrahma bhonti sahasrādhipatīguṇāḍhyāḥ /
trayayānadeśana akṣobhya'saṃhāraprāptā maitrāyanaḥ śubhaprabhā jagakleśaghāṭī //32//
ekakṣaṇena daśakṣetraśataḥsahasrā yāvā rajodhātu tattaka samādh'upenti /
paśyanti tattaka daśadiśi sattvasārān bhūyo ataḥ praṇidhiśreṣṭhavyūhanekāḥ //33//
saṃkṣepa eṣa nirdiṣṭo aṣṭamāyā jinātmajāḥ /
vistara kalpakoṭībhir na śakyaḥ sarva bhāṣitum //34//