te śukladharm'upacitāḥ kuśalopapetāḥ paryupāsitāḥ sugata maitrakṛpānukūlāḥ /
adhimuktyudāra kuśalāśayaśuddhabhāvāś cittaṃ janenti atulaṃ jinajñāna hetoḥ // 1 //
sarvajñabuddhabalaśodhanavīryasthāmā jinadharmaniṣpattijagatparitrāyaṇārthāḥ /
mahākṛpopacaya vartanadharmacakraṃ jinakṣetraśodham upapadyati cittaśreṣṭham // 2 //
tryadhvaikavikṣaṇavibuddhananirvikalpā nānāvidhe jagati kāla viśodhanārtham /
saṃkṣepa sarvaguṇa eṣitu nāyakānām ākāśatulya samudeti udāracittam // 3 //
prajñādhipatya kṛpapūrvam upāyayuktam adhimukti-āśayaviśuddhabalāpramāṇam /
āsaṅgatābhimukhatā-aparapraṇeyaṃ samatopapetasugataṃ varacittajātam // 4 //
sahajāticittaratanaṃ sugatātmajānām atikrānta bālacari buddhacari hy upetaḥ /
jātaḥ kule daśabalāna anodyapadyaḥ samatāṃ jine anugato niyatāgrabodhiḥ // 5 //
ekasmi citta upapadyati bhūmilābho bhavate acalyu girirājasamāśayaś ca /
prāmodyaprītibahulaś ca prasādavāṃś ca utsāhavegavipulaḥ sad'udagracittaḥ // 6 //
saṃrambhahiṃsavigataś ca akrodhanaś ca hrīgauravārjavataraś ca susaṃvṛtaś ca /
jagatāyanaṃ smarati apratimānajñānaṃ prītiṃ janety upagata spṛham eta sthānam // 7 //
pañcābhayā apagatāḥ sahabhūmilābho ājīvikāmaraṇa'kīrty atha durgatiś ca /
parṣadbhayaṃ ca vigataṃ tatha cchambhitatvaṃ kiṃ kāraṇaṃ tatha hi ātmaniketu nāsti // 8 //
te cchambhitatvavigatāḥ kṛpamaitrayuktāḥ śraddhāsugauravahriyopagatā guṇāḍhyāḥ /
rātriṃ divaṃ kuśalapakṣaniṣevamāṇāḥ satyārthadharmaniratā na tu kāmabhogaiḥ // 9 //
śrutadharmacintakuśalā aniketacittā lābhād aśīcittagatā utabodhicittāḥ /
jñānābhilāṣi balaśodhanabuddhadharmā eṣanti pāramita varjitamāyaśāṭhyāḥ // 10 //
yathāvādinas tathakriyāḥ sthitasatyavākyā na tu dūṣaṇā jinakule cari bodhiśikṣām /
lokakriyāya vigatā niratā jagārthaṃ śuklair atṛpta bhumayottarim ārabhante // 11 //
te eva dharmaniratā guṇa-arthayuktā abhinirharanti praṇidhiṃ jinadarśanāya /
saddharmadhāraṇ'upasaṃkramaṇā ṛṣīṇām abhinirharanti pranidhiṃ varacārikāyām // 12 //
paripākasattva pariśodhanabuddhakṣetraṃ te cāsya kṣetra sphuṭikā jina-aurasehi /
ekāśayā jinasutehi amoghatāyāḥ sarvatra vālapathi buddhiya hetum arthe // 13 //
etāṃś ca naikapraṇidhīn abhinirharanti te co anantavipulāya anantatāyā /
ākāśadhātusattvadharmatanirvṛtaṃ ca loko hy aniṣṭha jinam utpadi jñānabhūmī // 14 //
cittasya no viṣayajñānapraveśaniṣṭhā yā vartanitrividha niṣṭha jagaty anantā /
praṇidhānaniṣṭhitu bhaven na mamaivarūpā yatha eta niṣṭha tathe carya samā labheyam // 15 //
evaṃ sunirhṛta sumārdavasnigdhacittāḥ śraddheta buddhaguṇa sattvavilokayantaḥ /
pr(at)ītyāntulambhupagataḥ kṛpamaitratāṃ ca paritāyitavya maya sattvaduḥkhārditāni // 16 //
teṣārthi tyāgavividhaṃ puna ārabhante rājyaṃ varaṃ vividharatnahayān gajāṃś ca /
śirahastapādanayanā svakam ātmamāṃsaṃ sarvaṃ tyajanti na ca dīnamanā bhavanti // 17 //
eṣanti śāstravividhān na ca khedam eti
śāstrajña lokacaritāny anuvartayanti /
lokajñatām upagatā hriyatādhṛtiṃ ca pūjyanti cāpratisamān gurugauraveṇa // 18 //
eṣābhiyuktavidunā divarātrinityam uttapyate kuśala svarṇa yathaiva agnau /
so cāpi eva parikarma daśāna bhūmī kṛtvā asaṅgatam upeti aviṣṭhihantā // 19 //
yathā sārthavāha mahasārthahitāya yukto pucchitva mārgaguṇa kṣematam abhyupeti /
evam eva bhūmiprathamāsthitabodhisattvaḥ kṛtaniṣkramo daśabhi bodhim upety asaṅgaḥ // 20 //
atra sthitā guṇadharā nṛpatībhavanti dharmānuśāsaka-ahiṃsakamaitrayuktāḥ /
jambūdhvajaṃ sakalarājya praśāsayantaḥ sthāpenti tyāgi janatāṃ varabuddhajñāne // 21 //
ākāṅkṣamāṇa vṛṣabhī vijahitva rājyaṃ jinaśāsane upagataś cari ārabhantaḥ /
labdhvā samādhiśata buddhaśataṃ ca paśyi kampenti kṣetraśatu bhāsi atikramanti // 22 //
śodhyanti sattvaśata dharmamukhān viśanti praviśanti kalpaśata kāyaśataṃ nidarsi /
pūrṇaṃ śataṃ jinasutāna nidarśayanti bhūyottari praṇidhiśreṣṭhibalāpramāṇāḥ // 23 //
ity eṣā prathamā bhūmir nidiṣṭā sugatātmajāḥ /
sarvalokahitaiṣīṇām bodhisattvāna'nuttamāḥ // 24 //