evaṃ viśodhita caturṣu jinācarīṣu buddhya triyādhvasamatā anucintayanti /
śīlaṃ ca citta pratipatti tu mārgaśuddhiḥ kāṅkṣāvinītavidu pañcami ākramanti // 11 //
smṛticāpa indriyaiṣu anivartitāś ca samyakprahāṇahaya vāhana-ṛddhipādāḥ /
pañcabalāḥ kavaca sarvaripū abhedyāḥ śūrāṇivartividu pañcami ākramanti // 12 //
hryapatrāpyavastra vidunāṃ śucisīlagandho bodhyaṅgamālya varadhyānavilepanaṃ ca /
prajñāvicāraṇavibhūṣaṇ'upāyaśreṣṭham udyānadhāraṇitapañcamim ākramanti // 13 //
catu-ṛddhipādacaraṇāḥ smṛtiśuddhigrīvāḥ kṛpamaitraśreṣṭhanayanā varaprajñadaṃṣṭrā /
nairātmyanāda ripukleśapradharṣamāṇā narasiṃha samya vidu pañcamim ākramanti // 14 //
te pañcamīm upagatā varabhūmiśreṣṭhaṃ pariśuddhamārgaśubham uttari bhāvayanti /
śuddhāśayā vidu jinatva 'nuprāpaṇārthī kṛpamaitra khedavigatā anucintayanti // 15 //
sambhārapuṇyupacayā tatha jñānaśreṣṭhaṃ naikā upāya abhirocana bhūmya bhāsān /
buddhādhiṣṭhāna smṛtimāṃ matibuddhiprāptā catvāri satyanikhilān anucintayanti // 16 //
paramārthasatyam api saṃvṛtilakṣaṇaṃ ca satyavibhāgam atha satyanitīraṇaṃ ca /
tatha vastu sāśravakṣayam api mārgasatyaṃ yāvanta nāvaraṇasatya samosaranti // 17 //
evaṃ ca satya parimārgati sūkṣmabuddhir na ca tāvad 'nāvaraṇa prāptu vimokṣaśreṣṭham /
jñānādhimuktivipulāt tu guṇākarānām atibhonti sarvajagato arhapratyayānām // 18 //
so eva satya-abhinirhṛtatattvabuddhir jānāti saṃskṛtamṛṣāprakṛtī asāram /
kṛpamaitra-ābha labhate sugatāna bhūyaḥ sattvārthikaḥ sugatajñānagaveṣamāṇaḥ // 19 //
pūrvāpare vidu nirīkṣatu saṃskṛtasya mohāndhakāratamasāvṛta duḥkhalagnā /
abhyuddharoti jagato duḥkhaskandhavṛddhān nairātmya jīvarahitāṃs tṛṇakāṣṭhatulyān // 20 //
kleśādvayena yugapat punarbhāsi tryadhvaṃ cchedo duḥkhasya na ca anta samosarantaḥ /
hanto praṇaṣṭajanate 'tidayā'bhijātā saṃsārasrota na nivartati niḥsvabhāvam // 21 //
skandhālayā uragadhātu kudṛṣṭiśalyāḥ saṃtapta-agnihṛdayāvṛta andhakāre /
tṛṣṇārṇavaprapatitā avalokanatvāt jinasārthavāhavirahā duḥkha-arṇavasthāḥ // 22 //
evaṃ viditva punar ārabhate 'pramatto tac caiva ārabhati sarvajagadvimokṣī /
smṛtimantu bhonti matimān gatimān dhṛtīṃ ca hrīmāṃś ca bhonti tatha buddhina prajñavāṃś ca // 23 //
avitṛptu puṇyupacaye tatha jñānaśreṣṭhaṃ no khedavān aśithilo balam eṣamāṇaḥ /
kṣetraṃ vidhāya jinalakṣaṇa buddhaghoṣam avitṛpta sarvakriya sattvahitārthayuktaḥ // 24 //
paripācanāya jagato vidu śilpasthānān lipimudrasaṃkhyagaṇadhātucikitsatantrān /
bhūtagrahāviṣamaroganivartanārthaṃ sthāpenti śāstrarucirān kṛpamaitrabuddhī // 25 //
varakāvyanāṭakamatiṃ vividhapraharṣān nadyodiyānaphalapuṣpaniṣadyasthānān /
sthāpenti nekakriya sattvasukhāpanārthaṃ ratnākarāṃś ca upadarśayi naikarūpān // 26 //
bhūmīcalaṃ ca grahajyotiṣacandrasūryau sarvāṅgalakṣaṇavicāraṇa rājyasthānam /
ārūpyadhyāna tatha'bhijña athāpramānā abhinirharanti hitasaukhyajagārthakāmāḥ // 27 //
iha durjayām upagatā varaprajñacārī pūjenti buddhanayutā śṛṇuvanti dharmam /
teṣāṃ śubhaṃ punar uttapyati āśayaś ca svarṇaṃ yathā musaragalvaya saṃvimṛṣṭam // 28 //
ratnāmayāgrahavimāna vahanti vātā te yehi tehi tu vahanti asaṃhṛtāś ca /
tatha lokadharmi caramāna jagārthacārī asaṃhārya bhonti yatha padma jale aliptam // 29 //
atra sthitā tusita īśvara te kṛtāvī nāśenti tīrthyacaraṇān pṛthudṛṣṭisthānān /
yac cācaranti kuśalaṃ jinajñānahetoḥ sattvāna trāta bhavamo daśabhir balāḍhyaiḥ // 30 //
te vīryam uttari samārabhi apramattāḥ koṭīsahasrasugatān abhipūjayanti /
labdhvā samādhi vidu kampayi kṣetrakoṭī praṇidhīviśeṣu anubhūya guṇākarānām // 31 //
iti eṣā pañcamī bhūmir vicitropāyakoṭibhiḥ / nirdiṣṭā sattvasārānām uttamā sugatātmajāḥ // 32 //