gambhīrajñānaparamārthapadānusārī ṣaḍbhūminiścitamatiḥ susamāhitātmā /
prajñām upāya yugapady abhinirharanto bhūmyākramanti vidu saptamicaryaśreṣṭhām // 13 //
śūnyānimittapraṇidhī kṛpamaitrayuktā buddhānudharmasugatānugapūjayantaḥ /
jñānena śubhamahapuṇyabalebhy atṛptās tām ākramanti vidu saptamibhūmideśam // 14 //
traidhātukena adhivāsavivekaprāptāḥ śāntaś ca kleśajvalaśāntijagābhikāṅkṣī /
pratibhāsamāyasupinādvayadharmacārī kṛpa darśayanti vidu saptamim ākramanti // 15 //
śodhenti kṣetrakhasamāśayanirvikalpā jinalakṣanair upāgato 'caladharmatāyām /
abhilāpyaghoṣavigatā jagatoṣaṇārthaṃ kṣaṇajñānacittasya jināna samosaranti // 16 //
abhāsaprāpta imi dharma vicārayanti ākrānta bhūmipravarāṃ jagadarthakārāḥ /
te atra bhūmyasthita sattvacarī anantān vicinanti karma sugatāna yutāpramāṇān // 17 //
kṣetrāṃś ca naikavidhadharmathakalpasaṃkhyān adhimukti-āśaya ca cittavicitradhārān /
triyāṇadeśanam ananta samosaranti asmābhi sattvaparipācayitavyam etat // 18 //
ye te jñānanicitā varamārgaprāptā īryāpathaiś caturbhi prajñam upāyayuktāḥ /
sarvasmi cittakṣaṇi bodhiguṇānuprāptāḥ paripūrayanti daśapāramitāpraveśān // 19 //
sarveṣu mārgakuśalasya ya eṣa dānaṃ śīlaṃ ca kleśapraśamaṃ kṣama akṣatitvam /
vīryaṃ ca bhūyu anu-uttari ārabhante mārge acalyataya dhyāna guṇānvitānām // 20 //
anutpādakṣāntivirajā varaprajñaśreṣṭhā parṇām'upāya praṇidhī bhuyu kāṅkṣilakṣmī /
ato 'mardiyatvabala jñāna nitīraṇatvād evaṃ khu bodhiguṇa sarvakṣaṇe 'nupenti // 21 //
ālambanāt tu prathamā guṇapāripūri dvitīyā malāpanaya ūrdhva vibandhacchedam /
caturthāya mārgu samatākriya pañcamāya anutpāda-āhvaya viduḥ puna ṣaṣṭhavṛttiḥ // 22 //
iha saptamīm upagatāḥ sakalaṃ guṇāni praṇidhānanaikavividhān abhinirharanti /
kiṃ kāraṇaṃ yad iha jñānakriyābhyupenti sā aṣṭamī prabhṛti sarvaviśuddhyupenti // 23 //
duratikramā dūraṃgamā bahujñānakarmā kṣetrāntaradvipatham eva yathottaranti /
vicaranti saptasu aliptanṛpo yathaiva mārgasthitā na puna sarvatikrāntadhīrāḥ // 24 //
yada aṣṭamīm upagatāḥ puna jñānabhūmim atikrānta cittaviṣaye sthita jñānakarme /
brahmā na pekṣati jagan naramānuṣātmā evaṃ caranti vidu padmam ivā aliptāḥ // 25 //
atra sthitā vividhakleśam atikramanti teṣāṃ na kleśacari no ca kṣayo 'nuprāptiḥ /
mārgasthitā na tada kleśacariṃ caranti saṃpūrṇa-āśayajinajña kṣayo na tāvat // 26 //
ye laukikā vividhaśilpakriyāprayogā jānāti sarvavidunā sthita śāstrajñāne /
dhyānā-abhijñabalabhāvayanto 'bhyupenti bhūyaḥ samādhivividhān abhinirharanti // 27 //
atikrānta śrāvakacariṃ tatha pratyayānāṃ sthita bodhisattvacaraṇe vidu saptamāṇām /
pūrve hi āśayatayā iha jñānatāyā nṛpatīsuto yatha vivṛddhabalopapetaḥ // 28 //
gāmbhīryatām upagatā bhuyu ārabhanti cittaṃ nirodh'upagatā na ca sākṣikriyāḥ /
yathā sāgare upagatāḥ sthitayānapātre pratyakṣasarva-udake na ca yānahāniḥ // 29 //
bhūyo upāyabalaprajñavarābhyupetā durjñeyasarvajagajñānakriyāguṇāḍhyāḥ /
pūjenti buddhaniyutā bhuyu śuddhibhāvā yathā tadvibhūṣaṇavicitritu naikaratnaiḥ // 30 //
atra sthitāna vidunāṃ varaprajña-ābhā śoṣenti tṛṣṇasalilaṃ yatha bhāskārābhāḥ /
te atra bhūmyupagatā vaśavartinaś ca bhontī kṛtī kuśalajñānaphalopadeśaiḥ // 31 //
ākāṅkṣamāṇadṛḍhavīryabalābhyupetāḥ koṭīnayūtaśatabuddhasahasrapūrṇān /
paśyanti sarvadiśatāsu samāhitatvād bhūyo 'py ataḥ praṇidhiśreṣṭhaguṇāprameyāḥ // 32 //
durjñeyā sarvalokena vaśipratyekacāribhiḥ / ity eṣā saptamī bhūmir upāyaprajñaśodhanā // 33 //